चांगला माणूस
कधी कधी मनात हा प्रश्न पडतो की, चांगला माणूस कोणाला म्हणावं ? जो आई बाबाचं ऐकतो त्याला चांगला माणूस म्हणावं का जो बायकोचं ऐकतो त्याला म्हणावं ? मित्रांचे सल्ले ऐकून वागतो त्याला चांगलं म्हणावे की बहीण-भावाचे ऐकून वागतो त्याला म्हणावं ? सासू सासाऱ्यांचे ऐकणाऱ्याला चांगले म्हणावे की शेजाऱ्याचे ऐकून वागणाऱ्याला चांगले म्हणावे ? खूप खोलवर विचार केल्यास या प्रश्नांची उकल लवकर होत नाही तेंव्हा डोके गरगरायला लागते आणि डोके दुखू लागते. एखादा व्यक्ती आयुष्यभर जरी चांगला वागला नाही तरी अंत्यविधीच्या वेळी प्रत्येकजण चांगला माणूस होता असे म्हणतात, हे ही कोडे अजून सुटलेले नाही. सर्वांनी आपणांस चांगला माणूस म्हणावं म्हणून प्रत्येकाची आयुष्यभर धडपड चालू असते. आपल्या चांगुलपणाचा कोणी फायदा घेतला की मग तळपायाची आग मस्तकाला गेल्याशिवाय राहत नाही. समाजात असे ही पाहायला मिळते की, आपणांस कोणी चांगला म्हणो किंवा ना म्हणो आपण आपल्या मर्जीनुसार वागायचे. कोणाचे काही ऐकून घ्यायचे नाही. मात्र आपले म्हणणे प्रत्येकांनी ऐकलेच पाहिजे असा त्यांचा अट्टाहास असतो. अश्या लोकांना समाजात वावरतांना अनेक समस्यांना तोंड द्यावे लागते. म्हणून चांगला माणूस होणे केंव्हाही चांगले. सर्वांचे ऐकून आपल्या मनाला आणि बुद्धीला पटेल त्याप्रमाणे वागणारे माणसेच या जगात यशस्वी आहेत. आपण मेल्यानंतर आपणांस सर्वजण चांगला माणूस होता असे म्हणावे असे वागू या. चला तर मग आपण ही चांगला माणूस होण्याचा प्रयत्न करू या. त्यासाठी एकच करायचं आहे,
बोलणाऱ्या माणसाचे बोलणे पूर्ण ऐकून घ्या आणि त्यानंतर बोला.
🄽🄰🅂🄰
No comments:
Post a Comment