पुढच्या वर्षी लवकर या.......!
भक्ती, श्रद्धा, उत्साह आणि आनंदाचा अपूर्व संगम घडवणारा गणेशोत्सव आता निरोपाच्या वळणावर येऊन ठेपला आहे. दहा दिवस घराघरांत आणि सार्वजनिक मंडळांत भक्तिभावाने विराजमान झालेल्या गणरायाला निरोप देताना प्रत्येक भक्ताच्या ओठांवर एकच आर्त स्वर उमटतो "गणपती बाप्पा मोरया, पुढच्या वर्षी लवकर या!"
हे केवळ गणरायाला निरोप देणारे शब्द नाहीत, तर त्यात भक्ताच्या मनातील प्रेम, ओढ, श्रद्धा आणि पुन्हा भेटण्याची आतुरता सामावलेली आहे. गणेशोत्सवाचे दिवस म्हणजे आनंदाची पर्वणी. घरातील लहानांपासून मोठ्यांपर्यंत प्रत्येक जण बाप्पाच्या आगमनाने आनंदून जातो. आरतीचा गजर, मोदकांचा सुगंध, फुलांची सजावट, ढोल-ताशांचा निनाद आणि भक्तिमय वातावरण यामुळे अवघे जीवन चैतन्यमय होऊन जाते. बाप्पाच्या आगमनाने घरात केवळ मूर्ती येत नाही, तर आनंद, सकारात्मकता आणि एकोप्याची भावनाही प्रवेश करते.
मात्र, दहा दिवसांचा हा आनंदसोहळा संपताना मनात एक हुरहूर निर्माण होते. कालपर्यंत ज्या बाप्पाच्या दर्शनासाठी आपण आतुर होतो, त्याच बाप्पाला आज निरोप देण्याची वेळ येते. डोळ्यांत अश्रू, ओठांवर नामस्मरण आणि मनात पुढील वर्षाच्या आगमनाची आस घेऊन भक्त गणरायाला निरोप देतात. म्हणूनच "पुढच्या वर्षी लवकर या" या शब्दांना भावनिक अर्थ प्राप्त होतो.
पण या निरोपाच्या क्षणी आपण गणरायाकडून नेमके काय मागतो, याचाही विचार करायला हवा. केवळ पुढच्या वर्षी लवकर या, एवढीच आपली अपेक्षा असावी का? की पुढच्या वर्षी येताना आपल्या जीवनात काही सकारात्मक बदलही घडलेले असावेत? गणरायाच्या आगमनापासून विसर्जनापर्यंत आपण जी भक्ती, शिस्त, एकोपा आणि सेवाभाव अनुभवतो, तो वर्षभर आपल्या आचरणात उतरवण्याची गरज आहे.
गणेशोत्सव हा केवळ धार्मिक उत्सव नसून सामाजिक एकतेचा, सांस्कृतिक जतनाचा आणि सामूहिक जबाबदारीचा उत्सव आहे. सार्वजनिक गणेशोत्सवाच्या माध्यमातून समाजातील विविध घटक एकत्र येतात. मंडळे सामाजिक उपक्रम राबवतात, रक्तदान शिबिरे आयोजित करतात, गरजूंची मदत करतात आणि समाजप्रबोधनाचे कार्य करतात. हीच गणेशोत्सवाची खरी फलश्रुती आहे. उत्सव संपला तरी या कार्याचा उत्साह संपता कामा नये.
आज पर्यावरणपूरक गणेशोत्सव साजरा करणे ही काळाची गरज बनली आहे. निसर्गाचे रक्षण, जलप्रदूषण टाळणे, ध्वनिप्रदूषणावर नियंत्रण ठेवणे आणि सार्वजनिक स्वच्छता राखणे, हीदेखील गणरायाचीच सेवा आहे. गणपती आपल्याला बुद्धी, विवेक आणि सदाचाराची शिकवण देतो. त्यामुळे बाप्पाला निरोप देताना त्याच्या शिकवणीचे पालन करण्याचा संकल्प प्रत्येकाने करायला हवा.
गणरायाच्या विसर्जनाबरोबर उत्सवातील सजावट उतरते, मंडप रिकामे होतात, ढोल-ताशांचा आवाज शांत होतो; पण मनातील भक्तीचा दीप तेवत राहिला पाहिजे. बाप्पाच्या चरणी केलेली प्रार्थना केवळ दहा दिवसांपुरती मर्यादित न राहता ती आपल्या विचारांत आणि कृतीत प्रतिबिंबित झाली पाहिजे.
यंदाचा गणेशोत्सव आपल्याला आनंद, समाधान आणि एकोप्याच्या असंख्य आठवणी देऊन जात आहे. या आठवणींच्या शिदोरीवर आपण पुढील वर्षभर सकारात्मकतेने वाटचाल करूया. मनातील वाईट विचारांचे विसर्जन करूया, चांगल्या विचारांचे स्वागत करूया आणि समाजहितासाठी कार्य करण्याचा संकल्प करूया.
गणराया, तुझ्या आगमनाने आमची घरे उजळली, मने प्रसन्न झाली आणि आयुष्याला नवी उमेद मिळाली. आता निरोप घेताना एवढीच प्रार्थना आहे की, सर्वांच्या जीवनात सुख, शांती, समृद्धी आणि आरोग्य नांदो. शेतकऱ्यांच्या शिवारात हिरवाई फुलो, विद्यार्थ्यांच्या स्वप्नांना यश लाभो आणि समाजात प्रेम, बंधुभाव व माणुसकी वृद्धिंगत होवो.
आज तुला निरोप देताना मन भरून आले आहे. पण हा निरोप कायमचा नाही, ही तर पुन्हा भेटण्याची नांदी आहे. तुझ्या पुढील आगमनाची आस मनात जपत, तुझ्या शिकवणीचा मार्ग स्वीकारत आम्ही नव्या वर्षाच्या स्वागतासाठी सज्ज होऊ.
गणपती बाप्पा मोरया! मंगलमूर्ती मोरया! पुढच्या वर्षी लवकर या… पण येताना आमच्या जीवनात आनंदासोबत सद्बुद्धी, समृद्धीसोबत समाधान आणि भक्तीसोबत माणुसकीही घेऊन या
- नासा येवतीकर, धर्माबाद, 9423625769
No comments:
Post a Comment