शनिवारची दप्तरमुक्त शाळा

दप्तरमुक्त शाळेचे नियोजन कसे कराल ?

शनिवार हा दिवस शक्यतो दप्तरमुक्त शाळेसाठी निवड करण्यात यावे. त्या दिवसाचे वेळापत्रक खालीलप्रमाणे केल्यास मुलांना नक्की आनंद मिळेल.

परिपाठ - अर्धा तास

मास पी टी - अर्धा तास

श्रवण क्रियेसाठी - प्रत्येक वर्गातील एक कविता audio स्वरूपात ऐकविणे - अर्धा तास

भाषण - प्रत्येक वर्गातील मुलांना बोलते करण्यासाठी विविध प्रश्न आणि संदर्भ देऊन बोलते करणे. यात मुलांनी स्वतःचा परिचय, कुटुंबाची माहिती, गावाची आणि तालुक्याची माहिती दिली तरी चालेल. - अर्धा तास

वाचन - इयत्ता पहिली आणि दुसरी वगळता इतर वर्गातील मुलांकडून एक गोष्ट किंवा उताऱ्याचे अभिवाचन करून घेणे. जमल्यास फळ्यावर लिहिलेले वाक्य वाचन करणे. - अर्धा तास

संभाषण - दोन मुलांचे संवाद करण्याची क्रिया मराठी आणि इंग्रजी भाषेतून घ्यावी. यामुळे इतरांना संवाद कसे करावे याची माहिती मिळेल.

खेळ - विविध प्रकारचे Bमैदानी आणि बैठे खेळाचे आयोजन करून त्यात मुलांना सहभागी करून घेता येईल. मुलांना आनंद होईल अश्या खेळांची निवड करणे ह्यात शिक्षकांचे कौशल्य पणाला लागते. मुलांना नेमके कोणते खेळ आवडतात याची माहिती घेऊन त्याअनुषंगाने साहित्य गोळा करणे आवश्यक आहे. - अर्धा तास

भाषिक खेळ - मैदानावरील खेळ संपल्यावर मुलांना शालेय पोषण आहाराची चव द्यावी. जमल्यास या दिवशी पूरक आहाराची चव दिल्यास मुलांना अजून छान वाटेल. त्यानंतर सुमारे एक तास भाषिक खेळांचे नियोजन करावे. त्यात आठवड्यात शिकलेल्या भागावर मुलांनी प्रश्न विचारणे आणि मुलांनीच उत्तर देण्याचा उपक्रम अगदी मजेशीर घेता येऊ शकतो. अंताक्षरीचा खेळ।घेता येऊ शकतो. मुलां-मुलीची नावे, गावाची नावे याचे देखील अंताक्षरी खेळता येते. मजेशीर कोडी विचारून मुलांच्या डोक्याला खुराक देता येईल. सरते शेवटी आजचा दिवस कसा वाटला ? याचे feedback एक दोन मुलांकडून घेणे गरजेचे आहे.

साहित्य - मिनी स्पीकर with माईक, ( यास मोबाईल attach करता येते.)

या सर्व क्रिया करतांना मुले कंटाळवाणे होणार नाहीत याची काळजी घेणे आवश्यक आहे.

एक शनिवार दप्तरमुक्त शाळा करून पाहावे. मुलांना तर आनंद वाटेलच शिवाय शिक्षक म्हणून आपणास समाधान देखील मिळेल याची खात्री आहे.

- नागोराव सा.येवतीकर
प्राथमिक शिक्षक, धर्माबाद